Целта на пот-компонентата е да го поддржи обезбедувањето на висококвалитетни обуки и советодавни услуги за земјоделските производители и агробизниси во два формати: Прво, ќе поддржи таргетирани обуки за специфични теми релевантни за корисниците на откупно-дистрибутивните центри во Ресен и во Струмица и логистичко-дистрибутивниот центар во Скопје, коишто ќе се изградат во рамки на проектот. Темите за обука вклучуваат, но не се ограничени на: подобрување на сортите на културите, особено на оние за извоз; добри земјоделски практики (ДЗП); органско земјоделство и паметни климатски технологии. Овие обуки ќе ги опфатат и советниците на АПРЗ, за да се подобрат нивните капацитети, односно да се подобрат нивните знаења и вештини. Второ, ќе обезбеди финансиска поддршка за производителите и агробизнисите низ Северна Македонија во форма на соодветни грантови за советодавни услуги што ќе ги обезбедат квалификувани советници. Со оглед дека постоечките советодавни услуги од страна на АПРЗ или услугите обезбедени од вработените во подрачните единици при МЗШВ главно обезбедуваат поддршка околу аплицирањето за ИПАРД фондовите, се очекува советодавните услуги поддржани од проектот да ги подобрат знаењата и вештините на земјоделците и агробизнисите во производствените и постбербените практики, изработка на бизнис планови и менаџерски вештини, маркетинг, итн. Ќе се формира база од регионални експерти кои обезбедуваат советодавни услуги на барање за производителите и агробизнисите во Северна Македонија. За таа цел, ќе бидат објавени огласи за изразување на интерес од експерти кои можат да обезбедат висококвалитетна помош и советодавни услуги за земјоделските стопанства и бизниси.
Поточно, пот-компонентата 1.1 ќе обезбеди финансирање за техничка помош (ТП) и консултантски услуги за: (а) спроведување на анализа на потребите за вештини и обука (проценка на потребите за обука на земјоделските производители и преработувачи во проектните области; (б) развој на база на податоци со проверени локални консултанти (обучувачи и даватели на советодавни услуги) со широко знаење и експертиза за обезбедување на обуки и советодавни услуги во различни области, вклучувајќи земјоделско производство/преработка, дистрибуција, деловно планирање и управување, иновации на производи, маркетинг и продажба и друго; (в) развој на прирачник за принципите и процедурите за примена за проектните технички советодавни услуги, вклучувајќи ги критериумите за подобност, итн.; (г) развој и спроведување на програма за подигање на јавната свест и информации за програмата за обука и советодавна поддршка на проектот; и (д) обезбедување на одобрени технички советодавни услуги за земјоделците. Активностите за ширење информации и управувањето со процесот на аплицирање за техничка советодавна помош ќе се одвиваат под водство на МЗШВ и подрачните единици на АПРЗ.
Проектот ќе финансира минимум 50 проценти од трошоците за техничките советодавни услуги по подобен одобрен земјоделец, врз основа на споредливи активности за споделување на трошоците во други проекти во регионот. Критериумите што треба да се земат предвид при аплицирање, исто така, вклучуваат поддршка на „јавните добра“, како што се агроеколошки практики за намалување на емисиите на стакленички гасови, усвојување на ефикасни технологии за вода/енергетика и паметни климатски технологии или за специфична поддршка на жените, младите и малите земјоделци. Пот-компонентата, преку технички советодавни услуги исто така ќе го промовира усвојувањето на дигитални технологии во оваа пот-компонента, вклучувајќи онлајн платформи, видеа и други алатки, за да се привлече младата земјоделска работна сила во Северна Македонија (40 проценти од сопствениците на земјоделско земјиште биле под 45 години во 2013 година).