Во организација на Проект за модернизација на земјоделството, кој го спроведува Министерство за земјоделство, шумарство и водостопанство на Република Северна Македонија со финансиска поддршка од Светска банка, се одржа информативна средба со претставници на ИКТ секторот во земјава, со цел презентација на концептот и техничката рамка на Интегрираната земјоделска информациска платформа.

Средбата беше реализирана во соработка со Стопанска комора за информатички и комуникациски технологии – МАСИТ, со цел навремено информирање на компаниите од областа на информатичките технологии и создавање основа за транспарентна и професионална соработка во претстојната постапка.

Обединување на системите во единствена дигитална платформа

Во рамки на настанот беше презентирана клучната активност од проектот, поточно воспоставување интегрирана информациска платформа за земјоделството, чија цел е:

– обединување и унапредување на постојните софтверски апликации во рамки на Министерството
– воспоставување стандардизиран проток на податоци
– развој на напредни аналитички алатки и BI решенија
– поддршка на креирање политики базирани на докази

Присутните компании беа запознаени со концептот и целите на платформата, техничката архитектура на системот, очекуваниот опсег на активности, фазите на имплементација, како и со планираните рокови за реализација.

Повик за активно учество на релевантни компании

Посебен акцент беше ставен на квалификациските критериуми и можностите за вклучување на компании со релевантно искуство во области како што се:

– BI платформи и аналитички решенија
– системи за управување и интеграција на податоци
– развој на комплексни информациски системи со GIS компоненти
– data warehousing и сродни технологии

Од страна на организаторите беше истакнато дека активно учество на компаниите, преку поставување прашања, коментари и предлози, ќе придонесе за дефинирање квалитетно и одржливо техничко решение, како и за успешна и транспарентна постапка за набавка.

Средбата се одржа на 3 март 2026 година со почеток во 11:00 часот, а интересот од страна на ИКТ секторот беше оценет како позитивен сигнал за подготвеноста на домашниот пазар да одговори на комплексни дигитални проекти од национално значење.

Со оваа активност, Проектот за модернизација на земјоделството продолжува со систематски пристап кон дигитализација на агро-секторот, зајакнување на институционалниот капацитет и воспоставување современа технолошка основа за управување со податоци во земјоделството.